అక్టోబర్ 15: విజయవాడ ఇంద్రకీలాద్రిపై కొలువుదీరిన శ్రీ కనకదుర్గమ్మకు భక్తులు అపురూపమైన స్వర్ణ కానుకను సమర్పించారు. దసరా శరన్నవరాత్రి మహోత్సవాల సందర్భంగా శ్రీకాకుళం పట్టణానికి చెందిన దాత కె. దుర్గా శ్రీనివాస్ అమ్మవారికి సుమారు రూ.75 లక్షల విలువైన బంగారు కిరీటాన్ని గురువారం బహూకరించారు.
నవరత్నాలతో సుందరంగా స్వర్ణ కిరీటం
ఎరుపు, నీలం, తెలుపు, ఆకుపచ్చ రంగుల రాళ్లతో సర్వాంగసుందరంగా తీర్చిదిద్దిన ఈ నవరత్న ఖచిత స్వర్ణ కిరీటం 494 గ్రాముల బరువు కలిగి ఉంది. దాత కె. దుర్గా శ్రీనివాస్ ఆలయ అధికారులకు ఈ కిరీటాన్ని భక్తిశ్రద్ధలతో అందజేశారు.
దేవస్థానం కార్యనిర్వహణాధికారి వి.కె. శీనా నాయక్, దసరా చీఫ్ ఫెస్టివల్ ఆఫీసర్ వి. త్రినాథరావు సంయుక్తంగా స్వర్ణ కిరీటాన్ని స్వీకరించారు.
దాత కుటుంబానికి ప్రత్యేక దర్శనం
కిరీటం సమర్పించిన అనంతరం దాత కుటుంబ సభ్యులకు అంతరాలయంలో శ్రీ కనకదుర్గమ్మ ప్రత్యేక దర్శనం కల్పించారు. దర్శనానంతరం వేద పండితులు వేదాశీర్వచనం అందించగా, ఆలయ అధికారులు అమ్మవారి శేషవస్త్రం, ప్రసాదాలను అందజేసి దాత కుటుంబాన్ని సత్కరించారు.
అమ్మవారి అనుగ్రహంతోనే కానుక సమర్పణ: దుర్గా శ్రీనివాస్
ఈ సందర్భంగా దాత కె. దుర్గా శ్రీనివాస్ మాట్లాడుతూ, లోకపావని అయిన కనకదుర్గమ్మ అనుగ్రహంతోనే ఈ స్వర్ణ కిరీటాన్ని సమర్పించుకునే భాగ్యం కలిగిందన్నారు. పవిత్రమైన దసరా శరన్నవరాత్రి ఉత్సవాల సమయంలో అమ్మవారికి స్వర్ణ కిరీటం సమర్పించే అవకాశం కల్పించిన ఆలయ ఈవోకు ప్రత్యేక కృతజ్ఞతలు తెలిపారు.
దసరా ఉత్సవాల వేళ అమ్మవారికి భక్తులు సమర్పిస్తున్న కానుకలు ఇంద్రకీలాద్రిపై ఆధ్యాత్మిక సందడిని మరింత పెంచుతున్నాయి.
