బోడు, భద్రాద్రి కొత్తగూడెం జిల్లా: తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ వేడుకలను భద్రాద్రి కొత్తగూడెం జిల్లా బోడు గ్రామంలో ఆదివాసీ మహిళలు ఘనంగా నిర్వహించారు. పూల బతుకమ్మలను అందంగా అలంకరించి, సంప్రదాయ దుస్తులు ధరించి, ఆటపాటలతో ఉత్సాహంగా వేడుకల్లో పాల్గొన్నారు. మహిళల కోలాటాలు, బతుకమ్మ పాటలతో గ్రామంలో పండుగ వాతావరణం నెలకొంది.
ఈ కార్యక్రమానికి 9 తెగల జేఏసీ చైర్మన్ చుంచు రామకృష్ణ ముఖ్య అతిథిగా పాల్గొన్నారు. ఈ సందర్భంగా ఆయన మాట్లాడుతూ, ఆదివాసీ మహిళలు నిర్వహిస్తున్న బతుకమ్మ వేడుకల్లో పాల్గొని వారందరినీ కలుసుకోవడం ఎంతో ఆనందంగా ఉందన్నారు. మహిళలు ఐక్యంగా, ఉత్సాహంగా సంప్రదాయబద్ధంగా బతుకమ్మ వేడుకలను నిర్వహించడం అభినందనీయమని పేర్కొన్నారు.
బతుకమ్మ పండుగ తెలంగాణ ఆడపడుచుల ఆత్మీయతకు, ప్రకృతి ఆరాధనకు, సాంస్కృతిక వారసత్వానికి ప్రతీకగా నిలుస్తుందని అన్నారు. ఇలాంటి వేడుకల ద్వారా ఆదివాసీ సంస్కృతి, సంప్రదాయాలను భావితరాలకు అందించవచ్చని తెలిపారు.
ఆదివాసీ మహిళలు పెద్ద సంఖ్యలో పాల్గొని బతుకమ్మ వేడుకలను ఆనందోత్సాహాల మధ్య జరుపుకోవడంతో బోడు గ్రామంలో పండుగ సందడి నెలకొంది.
